Muhanga: Urubyiruko rusabwa kuba umusemburo w'impinduka n'iterambere rirambye

Urubyiruko rwo mu Karere ka Muhanga rwasabwe gukomeza kugira uruhare rufatika mu iterambere ry'igihugu, rwirinda imyitwarire ishobora kubangamira ejo harwo, ndetse rubyaza umusaruro amahirwe ariho kugira ngo rwiteze imbere.

Ibi byagarutsweho mu Nteko Rusange y'Inama y'Igihugu y'Urubyiruko mu Karere ka Muhanga yabaye ku wa 30 Kamena 2026, isoza umwaka w'imihigo wa 2025-2026, ku nsanganyamatsiko igira iti "Urubyiruko, umusingi w'iterambere rirambye."

Mu kiganiro cyatanzwe, urubyiruko rwagaragarijwe uruhare rwarwo mu kubaka ejo hazaza heza binyuze mu myitwarire myiza. Hibanzwe ku kwirinda inda z'imburagihe, ibiyobyabwenge, uburiganya n'izindi ngeso mbi zibangamira iterambere.

Abatanze ibiganiro banashishikarije urubyiruko kubyaza umusaruro amahirwe ahari, bashimangira ubutumwa bugira buti: "Think Big, Start Small, but Start Now."

Umuyobozi w'Akarere ka Muhanga, Kayitare Jacqueline, yashimiye urubyiruko uruhare rugira mu bikorwa by'iterambere, arusaba gukomeza kongera uwo musanzu no kubyaza umusaruro inguzanyo zigenewe imishinga y'urubyiruko n'amakoperative.

Yagize ati: "Ni ngombwa ko muzegera abakozi bashinzwe amakoperative, mukabona ayo mafaranga mukayashora mu mishinga ibateza imbere." Yasoje asaba urubyiruko gukomeza kuba imbaraga zubaka igihugu.