Polisi y’u Rwanda yatangaje ko abapolisi 74 barimo abo ku rwego rwa Ofisiye Mukuru bashyizwe mu kiruhuko cy’izabukuru, mu rwego rwo gukomeza gushyira mu bikorwa gahunda y’isezerano ry’akazi rishingiye ku myaka, ndetse no kunoza imikorere mu nzego z’umutekano.
Ibi polisi yabitangarije mu itangazo yashyize hanze ku wa kabiri tariki ya 2 Ukuboza 2025. Muri aba basezerewe, barimo ACP Sam Rumanzi, wabaye umuhuzabikorwa w’urwego rwunganira akarere mu by’umutekano-DASSO ku rwego rw’Igihugu.
Yanabaye kandi Umuyobozi wa Polisi y’u Rwanda mu Ntara y’u Burasirazuba, ndetse ayobora Polisi y’u Rwanda mu butumwa bw’amahoro muri Centrafrique.
Undi washyizwe mu kiruhuko cy’izabukuru ni ACP Francis Muheto, wayoboye Polisi y’Igihugu mu Ntara y’Amajyaruguru.
Uretse aba bayobozi bakuru, Polisi yatangaje ko abandi bashyizwe mu kiruhuko barimo ba Ofisiye bakuru 9, ba Ofisiye bato 12 ndetse n’Abapolisi bato 38.
Itangazo rya Polisi y’igihugu ryo ku wa Kabiri, risoza rivuga kandi ko hari abandi bapolisi 13 basezerewe ku mpamvu z’uburwayi, n’abandi babiri basezerewe ku zindi mpamvu zitandukanye.