Tariki ya 18 Ukwakira 2024, hateganyijwe umuhango wo Kwita izina abana b’ingagi 22.
Uyu muhango uzabera mu nkengero za Pariki y’Ibirunga ho mu Karere ka Musanze, uzaba ubaye ku nshuro ya 20.
Mu kiganiro Ikigo cy’igihugu gishinzwe’iterambere (RDB) cyagiranye n’itangazamakuru tariki ya 25 Nzeri 2024, hagaragajwe umumaro w’uyu muhango mu myaka 20 ishize uba.
Umuyobozi ushinzwe ubukerarugendo muri RDB, Michaella Rugwizangoga yagize ati “Binyuze muri iki gikorwa ngarukamwaka, twishimira intambwe twateye mu kubungabunga ibidukikije. Twishimira kandi uruhare rukomeye rw’abaturage b’imbere mu gihugu, inzobere mu kubungabunga urusobe rw’ibinyabuzima, ndetse n’abafatanyabikorwa baturuka hirya no hino ku isi.”
Rugwizangoga yatangaje ko Kwita Izina byafashije u Rwanda kumenyekanisha Pariki y’Ibirunga ku buryo muri 2023 u Rwanda rwinjije asaga miliyoni 620 z’amadolari ya Amerika avuye mu bashyitsi bangana na miliyoni 1.4 basuye Pariki y’Ibirunga.
RDB itangaza ko ubukerarugendo bushingiye ku ngagi bwonyine butanga 1% by’umusarurombumbe w’igihugu kandi bikaba imbarutso ikomeye y’iterambere ry’imibereho myiza y’abaturage bo mu gace.
Binyuze muri gahunda yo gusangira inyungu zituruka mu bukerarugendo, 10% by’amafaranga yose yinjira avuye mu mapariki y’igihugu ashorwa mu mishinga ifitiye akamaro imibereho y’abaturage baturiye izo pariki.
Kuva muri 2005, amafaranga angana na miliyari 12.86 z’amanyarwanda yakoreshejwe mu gutera inkunga imishinga 1,108 y’abaturage, irimo amashuri, ibigo nderabuzima, n’ubworozi.
Iyi mishinga yatumye abaturage bashobora kuba abarinzi b’ibikorwa bikorerwa murizi pariki z’igihugu nka Pariki y’Ibirunga, Akagera, Gishwati-Mukura na nyungwe.
