Urubyiruko rukomeje gutanga umusanzu mu iterambere rya Muhanga

By KWIZERA Bernard
Published on June 6, 2024
12:56 pm

Kuri uyu wa Gatatu, tariki 5 Kamena 2024, urubyiruko rwo mu Karere ka Muhanga rwagaragaje umusanzu rukomeje gutanga mu iterambere ry’Akarere ka Muhanga.

Ibi byagaragarijwe mu nama ngarukamwaka y’Inteko rusange y’inama y’Igihugu y’Urubyiruko mu Karere ka Muhanga.

Uretse urubyiruko ruhagarariye urundi mu nzego zinyuranye, iyi nama yanitabiriwe n’Umuyobozi w’Akarere ka Muhanga Madamu Kayitare Jacqueline, Umuyobozi w’Akarere wungirije ushinzwe imibereho myiza y’abaturage, Bwana Mugabo Gilbert, abahagarariye inzego z’umutekano n’abandi.

Mu byiciro binyuranye nk’ubukorerabushake, umutekano, kwihangira imirimo n’ibindi, urubyiruko rwagaragaje bimwe mu byo rwagezeho mu mwaka uri ku musozo wa 2023-2024.

Mu bukungu, urubyiruko rugaragaza ko hashinzwe amatsinda yo kwizigama ku bufatanye n’abaterankunga batandukanye ndetse urubyiruko ruharwa n’amahugurwa ku kwiteza imbere.

Urubyiruka rugaragaza kandi ko rwateye ibiti by’imbuto ziribwa zingana n’ibihumbi 4,600 ndetse n’ibiti bivangwa n’ibindi bihinwa bigera ku bihumbi 4,550 binyuze mu miganda yihariye y’urubyiruko muri rusange.

Uretse ibi, mu buhinzi urubyiruko rugaragaza ko rwitabiriye gahunda y’ubuhinzi bw’imboga ndetse n’ubworozi bw’umwuga harimo nk’ubworozi bw’inkoko n’ingurube.

Mu Kwihangira imirimo, ba rwiyemezamirimo bato basaga 60 bitabiriye gukora ibikoresho bikorerwa mu Rwanda ‘Made in Rwanda’ nk’imyenda, imikandara, inkweto n’ imitako yo mu nzu.

Si ibyo gusa kuko urubyiruko rwagaragaje ingufu mu guteza imbere gahunda z’ikoranabuhanga ku rwego rushimishije n’ibindi bigiye bitandukanye bibafasha kwiteza imbere ndetse n’igihugu muri rusange.

Muri uku gutanga umusanzu mu iterambere ry’akarere ka Muhanga, urubyiruko ruvuga ko rugihura n’imbogamizi zirimo kutagira ibikoresho bihagije nka mudasobwa na murandasi byifashishwa n’urubyiruko batanga raporo ku gihe, ibigo by’urubyiruko bidahagije mu mirenge igize Akarere ka Muhanga n’izindi.

Umuyobozi w’Akarere ka Muhanga, Madamu Kayitare Jacqueline, agaragaza ko ntaho urubyiruko rutemerewe gutangira umusanzu kubera ko imbaraga z’Igihugu zubakiye kuri rwo kandi ko ikizere urubyiruko rufitiwe n’ubuyobozi bizera neza ko kitaraza amasinde.

Madamu Kayitare akomeza avuga ko Leta igenda ishyiraho amahirwe ku rubyiruko rushaka gukora no kwiteza imbere.

Ati “Urubyiruko rwiga rwashyiriweho amashuri kugira ngo rwige neza ndetse n’urubyiruko rutiga rufite ikiciro cy’amashuri rwagarukiyeho rutekerezwaho. Hari amahirwe igihugu cyatanze kugira ngo bikorwe neza.”

Umuyobozi w’Akarere yasabye urubyiruko kwemera ko bakwiriye kuva mu kiciro cy’abantu bahanze amaso abandi ahubwo bakemera guhangwa amaso mu iterambere ry’igihugu.