Perezida Samia Suluhu Hassan yashyize umukobwa we witwa Wanu Hafidh hamwe n’umugabo we (umukwe wa Perezida) muri guverinoma nshya ya Tanzania, bitera benshi kubyibazaho ku mbuga nkoranyambaga muri icyo gihugu.
Muri iyi guverinoma yatangajwe ku wa Mbere tariki ya 17 Ugushyingo 2025, Wanu Hafidh yagizwe Minisitiri Wungirije w’Uburezi Siyanse n’Ikoranabuhanga, naho umugabo we Mohamed Mchegerwa agirwa Minisitiri w’Ubuzima, Mchegerwa yari asanzwe ari Minisitiri mu biro bya perezida.
Samia kandi yashyizeho Minisiteri itari isanzweho, Ministeri y’Ibireba Urubyiruko, nyuma y’iminsi micye habaye imyigaragambyo y’urubyiruko yakurikiye amatora y’umukuru w’igihugu yabaye mu kwezi gushize bitewe no kutemera uburyo aya matora yakozwemo.
Abatavuga rumwe n’ubutegetsi n’imiryango itegamiye kuri Leta bavuga ko igipolisi cyishe abantu babarirwa mu magana muri iyo myigaragambyo, imirambo ya benshi igahishwa. Ni mugihe Guverinoma ya Tanzania itigeze itangaza imibare y’abishwe cyangwa abakomekeye muri izo mvururu.
Icyakora mu cyumweru gishize, Samia yashyizeho komisiyo yo gukora iperereza kuri iyi midugararo yiciwemo abantu yabaye nyuma ya matora.
Perezida Samia yatsinze ayo matora ku majwi 98%, ibyo abatavuga rumwe n’ubutegetsi bwe bise “igisebo kuri demokarasi”.
Gushyira umukobwa we n’umukwe we muri guverinoma nshya birimo kuvugwaho cyane ku mbuga nkoranyambaga mu baturage ba Tanzania no mu karere.
Wanu Hafidh ni muntu ki?
Perezida Samila yagize umukobwa Wanu Hafidh Ameir Minisitiri
Wanu Hafidh Ameir wavukiye muri Zanzibar mu 1982, azwi cyane muri Tanzania nk’umukobwa mukuru wa Samia Suluhu na Hafidh Ameir.
Wanu yakurikiye inzira ya nyina, aba umunyaporitike mu ishyaka Chama cha Mapinduzi (CCM). Yabaye mu nama y’ubutegetsi y’iri shyaka ku rwego rw’igihugu, umwanya yarimo guhera mu 2010.
Yagiye ahabwa imirimo itandukanye ya politiki, aho kuva mu 2015 kugera mu 2018, yari umwe mu bagize komisiyo y’amategeko mu nteko ishinga amategeko.
Yabaye umukuru w’urubyiruko mu ishyaka CCM mu gace ko mu majyepfo y’ikirwa cya Zanzibar kuva mu 2008 kugeza mu 2012.
Wanu w’imyaka 43, ni umuyobozi w’ikigo kitegamiye kuri Leta cya ‘Women’s Initiative Foundation (MIF)’, akaba ari na we wagitangije mu 2022 muri Zanzibar agamije gufasha abana bo mu miryango itishoboye kwiga.
Kuva mu 2005, Wanu Hafidh ni umudepite uhagarariye ikirwa cya Zanzibar wo mu ishyaka CCM riri ku butegetsi.
Mu matora yo mu kwezi gushize, Wanu yagaragaye yamamaza nyina ngo atorwe nka perezida, ari na ko na we yiyamamaza ngo yongere atorerwe kuba umudepite.