Ibiro bya Minisitiri w’Intebe wa Israel, Benjamin Netanyahu, byatangaje ko yemeye kohereza intumwa muri Qatar, mu biganiro bigamije kurekura abagizwe imbohe no guhagarika intambara muri Gaza. Ni ibyatangajwe ku wa 2 Mutarama 2025.
Nk’uko CNN yabitangaje, itsinda ry’intumwa ziturutse mu nzego z’umutekano zirimo Urwego rw’Umutekano rwa Israel (ISA), Ingabo za Israel (IDF), n’Urwego rw’Ubutasi rwa Israel (Mossad), rizerekeza i Doha muri Qatar kugira ngo ibiganiro bibeho.
Ibi bibaye nyuma y’uko ibiganiro byagombaga kuba muri Kanama 2024 bihagarara kubera kutumvikana ku mpande zombi, aho Hamas yashakaga ko ingabo za Israel zose zivayo, mu gihe Israel yashakaga ko zimwe muri izo ngabo ziguma muri Gaza by’agateganyo, cyane cyane mu duce twa Philadelphi corridor na Netzarim corridor.
Nyuma y’uko kutumvikana mu Ugushyingo 2024, Qatar yatangaje ko yahagaritse uruhare rwayo nk’umuhuza.
Amakuru mashya yerekana ko ibiganiro bigiye gusubukurwa, mu gihe impande zombi zigaragaza icyizere gicye cyo kugera ku masezerano.
Umuryango wita ku miryango y’abagizwe imbohe, Hostages and Missing Families Forum, wasabye ko ibiganiro byihutishwa.
Mu masezerano y’agateganyo yari yagezweho mu mpera za 2023, abantu barenga 100 bari baragizwe imbohe na Hamas bararekuwe, Israel nayo irekura Abanye-Palestine bari bafungiyeyo.
Ku rundi ruhande, intambara muri Gaza yakomeje kwibasira abaturage. Minisiteri y’Ubuzima ya Gaza yatangaje ko Abanye-Palestine 45,581 bamaze kwicwa, abandi barenga 108,400 bakomeretse kuva intambara yatangira ku wa 7 Ukwakira 2023.
Israel yatangiye iyi ntambara nyuma y’uko abarwanyi ba Hamas bishe Abanye-Israel barenga 1,200, banagira imbohe abandi barenga 250.
Umuryango w’Abibumbye wita ku mpunzi z’Abanye-Palestine (UNRWA), hamwe n’indi miryango y’abagiraneza, bakomeje gusaba ko inkunga y’ibikoresho by’ibanze yongerwa. UNRWA ivuga ko abaturage kubura ibiribwa, amazi, n’ibikoresho by’ibanze bikomeje gushyira ubuzima bwabo mu kaga.
