Ikipe y’Umukino w’amaboko ‘Volleyball’ y’Ikigo cy’Igihugu gishinzwe ingufu (REG) mu cyiciro cy’abagabo n’Ikipe ya Volleyball y’Ikigo cy’Igihugu cy’Imisoro n’Amahoro (RRA) mu bagore nizo zatwaye irushanwa ryo Kwibuka no kuzirikana Rutsindura Alphonse.
Iri rushanwa ryiswe #MemorialRutsindura, ryaberaga mu Turere twa Gisagara na Huye kuwa Gatandatu no ku Cyumweru, tariki 8-9 Kamena 2024.
Iri rushanwa ngarukamwaka ryari ribaye ku nshuro ya 20, ryari ryitabiriwe n’amakipe 52 ya hano mu Rwanda no hanze yarwo.
Mu cyiciro cy’abagabo, umukino wa nyuma wahuje ikipe ya REG VC ndetse n’ikipe ya GISAGARA VC maze REG itsinda GISAGARA VC amaseti (3-2).
Mu cyiciro cy’abagore, umukino wa nyuma wahuje amakipe abiri ya APR WVC na RRA WVC maze birangira RRA WVC itsinze APR amaseti (3-1).
Mu mukino wa Volleyball yok u mucanga ‘Beach Volleyball’ igikombe cyegukanwe n’ikipe yari igizwe na Kwizera Pierre Marchall na Kansime.
Ni mu gihe mu cyiciro cy’amashuri, ikipe y’Ishuri rya Groupe scolaire officiel de Butare (GSOB) yatwaye igikombe itsinze Petit Séminaire Virgo Fidelis de Butare mu byiciro byose ‘icyiciro rusange O’Level n’icyiciro cy’ayisumbuye A’Level.
Irushanwa Memorial Rutsindura rigamije Kwibuka Rutsindura Alphonse wari umurezi mu Iseminari nto ya Butare ‘Petit Séminaire Virgo Fidelis de Butare’
Rutsindura ni umwe mu bateje imbere umukino wa Volleyball mu Rwanda cyane ko yari n’umutoza w’ikipe ya Volleyball ya Virgo Fidelis.
Rutsindura Alphonse yishwe muri Jenoside yakorewe Abatutsi mu 1994, yicanwa n’umugore we Mukarubayiza Verena ndetse n’abana babo Icyeza Alida, Iriza Alain na Izere Arsene.
