Leta ya Malaysia igiye kongera gushakisha ibisigazwa by’indege ya Malaysia Airlines MH370 yaburiwe irengero mu myaka icumi ishize.
Ibi byatangajwe na Minisitiri w’Ubwikorezi muri Malaysia, Anthony Loke, kuri uyu wa Gatanu, tariki ya 20 Ukuboza 2024.
Anthony Loke avuga ko igitekerezo cyo gushakisha iyi ndege yaburiye mu mpanuka itarasobanuka kugeza n’uyu munsi cyatanzwe n’ikigo cyo muri Leta Zunze Ubumwe za Amerika, Ocean Infinity, cyaherukaga kuyishakisha bwa nyuma mu mwaka wa 2018.
Kuri iyi nshuro, ibisigazwa by’iyi ndege ngo bizashakishirizwa mu gice gishya cyo mu majyepfo y’inyanja y’Abahinde.
Indege MH370, yo mu bwoko bwa Boeing 777 yari itwaye abagenzi 227 n’abakozi 12, yaburiwe irengero mu rugendo rwayo rwavaga Kuala Lumpur yerekeza i Beijing ku itariki ya 8 Werurwe 2014.
Loke yavuze ko Ocean Infinity izahabwa miliyoni 70 z’amadolari mu gihe ibisigazwa by’iyi ndege byaba bibonetse.
Abakoze ubushakashatsi bwa mbere bagaragaje ko bishoboka ko indege ishobora kuba yarayobejwe ku bushake bw’abapilote.
Icyo gihe ubushakashatsi bwagaragaje ko mu gihe kitageze ku isaha indege yari imaze mu kirere, uburyo bwo gutumanaho bwayo bwari bwahagaritswe. Radar y’igisirikare yagaragaje kandi ko indege yahindukiye ikagaruka muri Malaysia, ikanyura ku kirwa cya Penang, hanyuma ikerekeza mu majyaruguru y’ikirwa cya Sumatra.
Ibihugu bigera kuri 26 byagize uruhare mu bikorwa by’ubutabazi no gushakisha ibisigazwa by’indege gusa ntibyagize icyo bitanga.
Ku rundi ruhande, Leta ya Malaysia yatangaje ko MH370 yagenze kugeza ubwo lisansi yashiraga, urugendo rwayo rukarangirira mu ndiba y’inyanja y’Abahinde, ahantu hatandukanye na Beijing.
Ibikoresho bimwe, byemejwe ko byavuye kuri iyi ndege, byabonetse ku nkombe z’Afurika no ku birwa biri mu Nyanja y’Abahinde.
Imiryango y’ababuze ababo yakomeje gusaba indishyi ku kigo cya Malaysia Airlines, ku ruganda rwa Boeing, urukora moteri z’indege Rolls-Royce, ndetse n’itsinda ry’ubwishingizi rya Allianz, hamwe n’abandi.
Mu 2018, Malaysia yahaye Ocean Infinity inshingano zo gushakisha mu nyanja y’Abahinde, yemera kuyishyura miliyoni 70 z’amadolari mu gihe iyi ndege yaba ibonetse, ariko ntiyashoboye kubona ibisigazwa mu nshuro ebyiri zageragejwe.
Ibi byakurikiye ubushakashatsi bwo mu mazi bwari bwakozwe na Malaysia, Australia, n’u Bushinwa, igihugu cyari gifite abaturage 150 mu bari muri iyi ndege, mu gace ka kilometero kare 120,000 k’inyanja y’Abahinde, hashingiwe ku makuru y’imiyoboro y’ikoranabuhanga ya Inmarsat n’indege.
