Urukiko Mpuzamahanga Mpanabyaha (ICC) rwashyizeho impapuro zo guta muri yombi Minisitiri w’Intebe wa Isiraheli Benjamin Netanyahu, uwahoze ari Minisitiri w’Ingabo muri Isiraheli Yoav Gallant, ndetse n’Umuyobozi w’umutwe wa gisirikare wa Hamas, Mohammed al-Masri, uzwi nka Mohammed Deif, kubera ibyaha by’intambara bakekwaho.
Mu itangazo urukiko rwashyize ahagaragara kuri uyu wa Kane, ruvuga ko Netanyahu na Yoav Gallant bakekwaho ibyaha byibasiye inyokomuntu n’iby’intambara byakozwe kuva byibuze ku wa 8 Ukwakira 2023 kugeza byibuze ku wa 20 Gicurasi 2024.
Urukiko rwagaragaje ko hari ibimenyetso bifatika bishimangira ko Netanyahu na Gallant bagambiriye kwima abaturage ba Gaza ibintu by’ibanze bakeneye ku bw’ubuzima bwabo, birimo ibiribwa, amazi, imiti,amashanyarazi n’ibindi bicanwa.
Urukiko kandi rwemeje “mu bwumvikane busesuye” gushyiraho impapuro zo guta muri yombi Mohammed al-Masri (Mohammed Deif) kubera ibyaha by’intambara n’ibyibasiye inyokomuntu bikekwa ko yakoze muri Isiraheli no muri Palestina kuva ku wa 7 Ukwakira 2023. Ashinjwa ibyaha birimo ubwicanyi, iyicarubozo, gufata ku ngufu n’ibindi byaha by’ihohoterwa rishingiye ku gitsina.
Nubwo Isiraheli ivuga ko yishe Mohammed Deif mu gitero cy’indege cyagabwe mu majyepfo ya Gaza muri Nyakanga, urukiko rwemeje ko rugomba gukomeza gukurikirana uwo muntu kuko rudafite ubushobozi bwo kumenya niba koko yarapfuye cyangwa akiriho.
Umushinjacyaha w’Urukiko Mpuzamahanga Mpanabyaha, Karim Khan, yari yatanze ubusabe bwo guta muri yombi aba bayobozi bo muri Isiraheli hamwe n’abandi bayobozi batatu ba Hamas muri Gicurasi, abashinja ibyaha byakozwe mu gitero cya Hamas cyo ku wa 7 Ukwakira 2023 kuri Isiraheli no mu ntambara Isiraheli yakurikijeho muri Gaza.
Abashinjacyaha ba ICC bavuze ko hari ibimenyetso bifatika bigaragaza ko Netanyahu na Gallant, kimwe n’umuyobozi wa Hamas Yahya Sinwar, umuyobozi wa politiki Ismail Haniyeh, hamwe na Deif, bafite uruhare ku byaha by’intambara n’ibyibasiye inyokomuntu.
Haniyeh yiciwe muri Irani muri Nyakanga, mu gihe Sinwar yaguye mu mirwano n’ingabo za Isiraheli muri Ukwakira.
Netanyahu aherutse kwirukana Gallant, avuga ko yamutakarije icyizere kubera imicungire mibi y’intambara za Isiraheli muri Gaza no muri Libani.
N’ubwo Isiraheli itari umunyamuryango w’Urukiko Mpuzamahanga Mpanabyaha, Netanyahu yakomeje kunenga ibyo ashinjwa n’uru rukiko, abivuga nko kubahuka igisirikare cya Isiraheli ndetse n’igihugu cyose muri rusange.
Ariko ICC yatangaje kuri uyu wa Kane ko yatesheje agaciro ubujurire bwa Isiraheli.
Umuyobozi w’abatavuga rumwe na leta ya Isiraheli, Yair Lapid, yamaganye icyemezo cy’urukiko, avuga ko intambara ya Isiraheli muri Gaza ari urugamba rwo kwirwanaho ku bagizi ba nabi.
Uwahoze ari Minisitiri w’Ingabo Avigdor Lieberman yanditse kuri X (Twitter), ati: “Isiraheli ntizabisabira imbabazi mu kwirwanaho no kurengera abaturage bayo kandi izakomeza kurwanya iterabwoba nta kujenjeka.”
Umunyamakuru wa Al Jazeera ushinzwe gusesengura politiki, Marwan Bishara, yashimye icyemezo cy’urukiko cyo gushyiraho impapuro zo guta muri yombi aba bayobozi, avuga ko “byibuze abaturage ba Gaza, nyuma y’umwaka w’ubwicanyi, bashobora kubona ubutabera ku bakorewe ibyo byaha.”
Minisiteri y’Ubuzima muri Gaza itangaza ko intambara ya Isiraheli muri Gaza imaze guhitana Abanyapalestina nibura 44,056, abandi 104,286 bakaba barayikomerekeyemo kuva ku wa 7 Ukwakira 2023.
Ku rundi ruhande, abantu bagera ku 1,139 biciwe muri Isiraheli mu gitero cya Hamas cy’iyo tariki, naho abarenga 200 bashimutwa.
