Ku mugoroba wo kuri uyu wa Gatatu, tariki ya 11 Nzeri 2024, nibwo uruhererekane rw’imikino irindwi ya nyuma ya kamarampaka ruganisha ku gikombe cya Shampiyona ruri butangire.
Iyi mikino izahuza APR BBC na Patriots BBC, izwi nka nka BetPawaPlayoffs 2024.
Umukino ubimburira indi kuri uyu mugoroba uri bubere mu nyubako y’imyidagaduro ‘BK Arena’ i Saa 19:00 aho kwinjira ari amafaranga 2,000, 5,000, 10,000 na 20,000.
Muri uru ruhererekane, ikipe itsinzemo imikino ine niyo itwara igikombe cya Shampiyona ya Basketball mu Rwanda.
Ibyo wamenya kuri APR na Patriots
APR BBC na Patriots ni amakipe asanzwe afite ibigwi muri shampiyona ya basketball mu Rwanda.
Ni ku nshuro ya mbere Patriots BBC igiye guhura na APR BBC mu mikino irindwi yanyuma ya Kamarampaka “BetPawa Playoffs”.
Kugeza magingo aya, mu mikino 6 iheruka guza aya makipe yombi mu marushanwa anyuranye, APR BBC ni yo yatsinze imikino myinshi (4-2).
Iyi mikino irimo 3 (3-0), ya 1/2 cy’amarushanwa ya Kamarampaka “BetPawa Playoffs”, y’umwaka ushize wa 2023.
Ku rundi ruhande, Patriots BBC yatsinze APR BBC mu mikino yombi ya Shampiyona y’uyu mwaka wa 2024.
Muri uyu mwaka wa 2024, APR BBC yongeye gutsinda Patriots BBC muri 1/2 cya Rwanda Cup 2024.
Patriots BBC yasoje ku mwanya wa mbere ku rutonde rwa shampiyona (regular season), n’amanota 35.
Mu gihe APR BBC yo yasoje ku mwanya wa kabiri muri shampiyona n’amanota 34.
Patriots BBC yageze ku mukino wa nyuma isezereye Kepler BBC iyitsinze imikino 3-0, mu gihe APR BBC ifite igikombe cya shampiyona ya 2023, yo yageze ku mukino wa nyuma isezereye REG BBC iyitsinze imikino 3-0.
Kugeza ubu, APR BBC niyo ifite ibikombe byinshi kuko kuva mu 1995 kugeza ubu ifite ibikombe 14 mu gihe ikipe ya Patriots ifite ibikombe bya Shampiyona 4.
APR BBC irashaka kwisubiza igikombe cya shampiyona yatwaye umwaka ushize mu gihe na Patriots inyotewe no gutwara iki gikombe iheruka mu myaka ine ishize, ndetse ikaba inashaka gusubira muri BAL.
