Banki Nyafurika Itsura Amajyambere (AfDB) yemeje inkunga ya miliyoni 9.4 z’amadolari ya Amerika (ahwanye na miliyari 13.7 z’amafaranga) izahabwa u Rwanda mu rwego rwo gutera inkunga umushinga wo kurwanya imyuzure ukoresheje ibisubizo karemano.
Uyu mushinga ugamije kongerera imbaraga ubushobozi bwo guhangana n’imihindagurikire y’ibihe ku baturage ndetse no gukomeza ibikorwaremezo by’amazi mu turere tubiri twomu Ntara y’Iburengerazuba aritwo twa Karongi na Rusizi.
Ni umushinga ugamije kongera ubushobozi bwo guhangana n’ingaruka z’imihindagurikire y’ibihe mu bice bya Rusizi na Karongi bikunze kwibasirwa n’imyuzure, binyuze mu gushyira mu bikorwa ingamba zo kurwanya imyuzure zishingiye ku bidukikije no guteza imbere ibikorwa byo kubungabunga ubutaka no gusana imigezi biyobowe n’abaturage ubwabo.
Ibyitezwe kuri uyu mushinga birimo kugabanya ibyago byo kwibasirwa n’imyuzure n’inkangu, kugabanya isuri n’itwarwa ry’ubutaka mu mazi, ndetse no kongera umusaruro w’ubutaka.
Abaturage bagera kuri miliyoni 1.2 bazungukira mu kunoza uburyo bwo gutanga amakuru hakiri kare ku byago by’imyuzure no mu kongererwa uburinzi bw’imigezi, mu gihe abarenga 620,000 bazungukira mu kugabanyuka bw’ibyago by’imyuzure.
Ibindi bikorwa biteganyijwe muri uyu mushinga birimo gutera amashyamba ku buso bwa hegitari 10,000, kubaka inkuta zirinda imyuzure ziteweho ibimera, ndetse no gusana inkombe z’imigezi n’imisozi yangiritse.
Abantu barenga 6,000 bazahabwa amahugurwa ajyanye no guhangana n’ingaruka z’imihindagurikire y’ibihe, mu gihe abanyeshuri 120 biga amasomo ya tekinike bazahabwa amahirwe yo kubona ubumenyi ngiro mu bijyanye n’ubwubatsi burengera ibidukikije no gucunga umutungo kamere w’amazi.
Imyuzure n’inkangu byakomeje gushegesha iyi ntara kenshi, bihitana ubuzima bw’abantu, byangiza amashuri n’ibikorwaremezo by’amazi, ndetse bisenya n’imibereho y’abaturage.
Binyuze mu gukoresha ibisubizo karemano nko gutera amashyamba, gukora amaterasi no gukomeza inkombe z’imigezi, uyu mushinga uzafasha kugabanya isuri, kunoza ireme ry’amazi no kongera umusaruro w’ubuhinzi.
Ibi bikorwa bigamije kurinda ibikorwaremezo rusange by’ingenzi birimo imihanda, amashuri n’ibigo bisukura amazi, kugira ngo birindwe kwangizwa n’ibiza byibasira ako gace buri gihe.