Amashuri arimo APE Rugunga, G.S Remera Rukoma yamaze gutsindira kuzahagararira u Rwanda mu mikino ihuza amashuri yo muri Afurika y’Iburasirazuba (FEASSA).
Ibi byabaye nyuma yo gusoza imikino yo mu irushanwa ‘Amashuri Kagame Cup/2024’. Ni imikino yasorejwe mu Karere ka Muhanga kuri iki Cyumweru, tariki 9 Kamena 2024.
Mu mupira w’amaguru, Ishuri rya APE Rugunga ryo mu Karere ka Nyarugenge mu bahungu niryo ryatwaye igikombe ritsinze E.S Gasiza yo muri Rulindo igitego 1-0. Ku rundi ruhande mu bakobwa, G.S Remera Rukoma yo muri Kamonyi yatwaye igikombe itsinze CFC Rwamagana ibitego 4-0.
Mu mukino wa Handball, mu bahungu ikipe ya ADEGI Gituza yo muri Gatsibo yatwaye igikombe itsinze E.S Kigomba yo mu Karere ka Ruhango amanota 28-25. Mu cyiciro cy’abakobwa, Ishuri rya Kiziguro ryatwaye igikombe ritsinze irya Nyagisenyi ryo muri Nyagisenyi amanota 44-20.
Mu mukino wa Rugby, mu bahungu ikipe ya Gitisi TSS yo muri Ruhango, yatsinze ishuri rya Kayenzi ryo muri Kamonyi ibitego 28-7.
Muri Netball, G.S Gahini yo muri Kayonza yatsinze E.S Musanze ibitego 32-18.
Biteganyijwe ko aya makipe yose yatwaye ibikombe azahagararira u Rwanda mu mikino ya FEASSA izabera muri Uganda muri Kanama 2024.

