Kuri uyu wa Gatandatu, tariki ya 7 Nzeri 2024, abanya Algeria miliyoni 24 bazindukiye mu gikorwa cyo gutora perizida wabo.

 Abakandida batatu bifuza kuyobora iki gihugu cyo mu majyaruguru ya Afrika, ni Youcef Aouchiche uturuka mu ishyaka ritavuga rumwe  n’ubutegetsi rya  Front of socialist forces, Abdelaâli Hassani Cherif w’ishyaka rya Movement of society for peace ndetse na perezida warusanzweho Abdelmadjid Tebboune we akaba ari umukandida w’igenga.

Ibiro by’itora byafunguwe saa mbili z’igitondo ku isaha yo muri Algeria, biteganijwe ko bifunga saa moya z’umugoroba, ibyavuye mu matora byemewe bikazatangwaza bitarenze kuri iki cyumweru.

Umwe mu batoye, witwa Karim, yabwiye umunyamakuru wa RFI dukesha iyi nkuru ko buri munyalgeria wese azi ibizava mu matora nubwo bitaratangazwa.

Ikibazo nyamukuru nk’uko ababikurikiranira hafi babivuga, ni ukumenya niba Tebboune ashobora gutsindira ku majwi menshi kurusha mu matora yamugejeje ku butegetsi muri 2019, igihe abatora bagera kuri 60 ku ijana batitabiriye amatora.

Ayo matora yo muri 2019 yabaye nyuma y’imyigaragambyo yahiritse uwahoze ari perezida w’iki gihugu Abdelaziz Bouteflika mbere yuko bahagarikwa na polisi ndetse n’Ifungwa ry’abantu babarirwa mu magana bigaragambyaga.

Mu gihe abakandida 26 aribo batanze kandidatire ku ikubitiro, babiri gusa ni bo bemejwe ko bazahatana na perezida uriho ubu.

Tebboune yavuze ko iterambere ry’ubukungu ryazamutse muri manda ye ya mbere, harimo imirimo myinshi n’umushahara munini muri Algeria, ndetse no gutuma  iki gihugu kiba icyambere muri Afurika mu kohereza gazi nyinshi mu mahanga.

Umukandida wahoze ari umunyamakuru Youcef Aouchiche, avuga ko yiyemeje kurekura imfungwa zafunzwe binyuranije n’amategeko ndetse no gusuzuma amategeko arenganya.

Mu gihe Abdelaâli Hassani Cherif, avuga ko ashyize imbere umudendezo w’abenegihugu wagabanutse muri iyi myaka.